‘आई जगदंबे, ईडा-पिडा टळू दे, शेतकरी सुखी होऊ दे!’ विक्रम पाटील बामणीकर यांचे दुर्गामातेला साकडे

दुष्काळग्रस्त शेतकऱ्यांच्या व्यथा देवीच्या चरणी मांडल्या; पाच हजारांच्या मदतीवरून राज्य शासनावर टीका

नांदेड (प्रतिनिधी) : ‘आई जगदंबे, ईडा-पिडा टळू दे, शेतकरी सुखी होऊ दे आणि माझ्या बळीराजाला जगण्याचे बळ दे,’ अशी भावपूर्ण प्रार्थना छावा मराठा युवा महासंघाचे उपजिल्हाप्रमुख विक्रम पाटील बामणीकर यांनी दुर्गामातेच्या चरणी केली. कंधार तालुक्यातील बामणी (पंक) येथे माऊली नवरात्र दुर्गा महोत्सवानिमित्त आयोजित महाआरतीच्या वेळी त्यांनी शेतकऱ्यांच्या व्यथा मांडत बळीराजावरील संकट दूर करण्यासाठी देवीला साकडे घातले.

बामणी (पंक) येथे दरवर्षीप्रमाणे यंदाही माऊली नवरात्र दुर्गा महोत्सवानिमित्त दुर्गामातेची विधिवत प्रतिष्ठापना करण्यात आली आहे. नवरात्रोत्सवामुळे गावात भक्तिमय आणि उत्साहपूर्ण वातावरण निर्माण झाले असून, देवीच्या दर्शनासाठी महिला, युवक, ज्येष्ठ नागरिक आणि ग्रामस्थ मोठ्या संख्येने उपस्थित राहत आहेत. महोत्सवांतर्गत आयोजित महाआरती भक्तिभावाने पार पडली. यावेळी विक्रम पाटील बामणीकर यांच्या हस्ते दुर्गामातेची आरती करण्यात आली.

आरतीच्या वेळी बामणीकर यांनी शेतकऱ्यांच्या सद्यस्थितीचे चित्र दुर्गामातेच्या चरणी मांडले. ‘आई जगदंबे, माझ्या शेतकऱ्यावरील संकट दूर कर, त्याच्या आयुष्यातील दुःख आणि अडचणी दूर कर. शेतकऱ्याला सुखी ठेव आणि प्रतिकूल परिस्थितीशी लढण्यासाठी त्याला बळ दे,’ अशी आर्त हाक त्यांनी देवीला घातली. त्यांच्या या भावपूर्ण प्रार्थनेने उपस्थित भाविकांचे लक्ष वेधून घेतले.

निसर्गाच्या लहरीपणामुळे बळीराजा आर्थिक संकटात : यावेळी बोलताना विक्रम पाटील बामणीकर यांनी शेतकऱ्यांच्या अडचणींबाबत चिंता व्यक्त केली. ते म्हणाले की, शेतकरी हा जगाचा पोशिंदा म्हणून ओळखला जातो. आपल्या कष्टातून तो संपूर्ण समाजासाठी अन्नधान्य पिकवतो; मात्र आज निसर्गाच्या लहरीपणामुळे आणि अपुऱ्या पावसामुळे त्याच्यावर संकट ओढवले आहे. पाण्याअभावी शेतातील पिके वाळून जात असून, उत्पादनाची आशा मावळत आहे. शेतीत केलेला खर्च वसूल होण्याचीही शाश्वती राहिलेली नाही. अशा परिस्थितीत शेतकऱ्यांसमोर कुटुंबाचा उदरनिर्वाह, शेतीचा खर्च आणि कर्जाची परतफेड अशा अनेक समस्या उभ्या ठाकल्या आहेत.

‘ज्या शेतकऱ्याच्या कष्टावर देशाची अन्नव्यवस्था उभी आहे, त्याच शेतकऱ्याला आज जगण्यासाठी संघर्ष करावा लागत आहे. हातात पैसा नाही, पिकांना पाणी नाही आणि डोक्यावर कर्जाचा भार आहे. अशा कठीण परिस्थितीत माझ्या बळीराजाला धीर मिळावा, त्याच्या आयुष्यात पुन्हा समृद्धी यावी आणि त्याच्या कष्टाला योग्य फळ मिळावे,’ अशी भावना त्यांनी व्यक्त केली.

पाच हजारांची मदत म्हणजे शेतकऱ्यांची थट्टा? : दुष्काळग्रस्त शेतकऱ्यांना राज्य शासनाकडून जाहीर करण्यात आलेल्या पाच हजार रुपयांच्या मदतीवरही विक्रम पाटील बामणीकर यांनी तीव्र नाराजी व्यक्त केली. आर्थिक संकटात सापडलेल्या शेतकऱ्यांच्या अडचणींच्या तुलनेत ही मदत अपुरी असल्याचे मत त्यांनी मांडले. शेतकऱ्यांच्या नुकसानीची व्याप्ती मोठी असताना केवळ पाच हजार रुपयांच्या मदतीने त्यांच्या समस्या कशा सुटणार, असा सवाल त्यांनी उपस्थित केला. ही मदत शेतकऱ्यांना दिलासा देणारी ठरण्याऐवजी त्यांच्या वेदनांवर मीठ चोळणारी असल्याची टीका करत, शासनाने शेतकऱ्यांच्या परिस्थितीचा गांभीर्याने विचार करून अधिक भरीव मदत द्यावी, अशी अपेक्षा त्यांनी व्यक्त केली.

‘आई जगदंबे, माझ्या शेतकऱ्याला भरभरून दान दे. त्याच्यावर आलेले संकट दूर कर. त्याच्या शेतात पुन्हा हिरवळ फुलू दे, त्याच्या कष्टाला यश मिळू दे आणि त्याच्या कुटुंबात सुख-समृद्धी नांदू दे,’ अशा शब्दांत त्यांनी दुर्गामातेकडे प्रार्थना केली.

महाआरतीला भाविकांची मोठी उपस्थिती : 

बामणी (पंक) येथील माऊली दुर्गा महोत्सवात दरवर्षी नवरात्रोत्सव मोठ्या उत्साहात साजरा केला जातो. यंदाही विविध धार्मिक आणि सांस्कृतिक उपक्रमांमुळे महोत्सवाला उत्साहाचे स्वरूप प्राप्त झाले आहे. दररोज आरतीच्या वेळी सांस्कृतिक कार्यक्रमांचे आयोजन केले जात असून, हे कार्यक्रम पाहण्यासाठी ग्रामस्थ आणि भाविक मोठ्या संख्येने उपस्थित राहत आहेत.

महाआरतीदरम्यान उपस्थित भाविकांनी टाळ्यांच्या गजरात ‘आई जगदंबेचा उदो उदो’ असा जयघोष केला. संपूर्ण परिसर भक्तिमय वातावरणाने भारावून गेला होता. आरतीनंतर विक्रम पाटील बामणीकर आणि त्यांच्या परिवाराच्या वतीने उपस्थित भाविकांना प्रसादाचे वाटप करण्यात आले.

यावेळी गावातील प्रतिष्ठित नागरिक, महिला मंडळाच्या सदस्या, युवक, दुर्गामाता मंडळाचे पदाधिकारी आणि कार्यकर्ते तसेच ग्रामस्थ मोठ्या संख्येने उपस्थित होते. धार्मिक उत्सवाच्या माध्यमातून शेतकऱ्यांच्या प्रश्नांकडे लक्ष वेधत बळीराजाच्या सुख-समृद्धीसाठी करण्यात आलेल्या या प्रार्थनेची परिसरात चर्चा होत आहे.