नांदेड (शेख मुख्तार) : शहरातील वाहतुकीच्या दृष्टीने अत्यंत महत्त्वाचा असलेला मालटेकडी उड्डाणपूल व त्यावरील रस्त्याची दुरवस्था दूर करण्यासाठी गेल्या काही काळापासून सुरू असलेल्या पाठपुराव्याला आता पुन्हा यश मिळताना दिसत आहे. यापूर्वी निधी मंजुरीसाठी आवाज उठविल्यानंतरही काम प्रत्यक्षात अपेक्षित गतीने पुढे गेले नव्हते. मात्र, राष्ट्रवादी काँग्रेस (शरद पवार पक्ष) रऊफ जमीनदार यांनी संबंधित विभागाकडे सातत्याने पाठपुरावा करून रखडलेल्या कामाचा मुद्दा पुन्हा लावून धरला आहे. मालटेकडी उड्डाणपूल हा नांदेड शहरात ये-जा करणाऱ्या नागरिकांसाठी महत्त्वाचा मार्ग आहे. पुलावरील रस्त्यावर मोठमोठे खड्डे, खराब झालेला रोड आणि वाढती वाहतूक यामुळे वाहनधारकांना मोठ्या अडचणींचा सामना करावा लागत होता. विशेषतः रात्रीच्या वेळी अपघाताचा धोका निर्माण होण्याची शक्यता असल्याने या प्रश्नाकडे तातडीने लक्ष देण्याची मागणी सातत्याने होत होती.याच पार्श्वभूमीवर रऊफ जमीनदार यांनी यापूर्वी संबंधित विभागाकडे निवेदन देऊन मालटेकडी उड्डाणपूल व रस्त्याची तातडीने दुरुस्ती करण्याची मागणी केली होती. त्यांच्या पाठपुराव्यानंतर पुलावरील रस्ते दुरुस्तीच्या कामासाठी ५३ लाख ५६ हजार ६०० रुपयांचा निधी मंजूर करण्यात आल्याचे संबंधित वृत्तात नमूद करण्यात आले होते. मात्र निधी मंजूर झाल्यानंतरही प्रत्यक्ष काम रखडल्याने जमीनदार यांनी हा विषय पुन्हा संबंधित विभागाच्या निदर्शनास आणून दिला. ‘निधी मंजूर झाला म्हणजे प्रश्न संपला नाही; नागरिकांना प्रत्यक्षात चांगला रस्ता मिळेपर्यंत पाठपुरावा सुरूच राहणार,’ या भूमिकेतून त्यांनी विभागीय पातळीवर सातत्याने पाठपुरावा केल्याने आता रखडलेले काम पुन्हा सुरू करण्याच्या हालचाली सुरू झाल्या आहेत.
फोटोसेशन नव्हे, पाठपुराव्याचा मुद्दा चर्चेत : मालटेकडी उड्डाणपुलाच्या कामाला आता प्रत्यक्ष सुरुवात होण्याची चिन्हे दिसत असताना या कामाचे श्रेय घेण्यासाठी काही स्थानिक नेते पुढे येत असल्याची चर्चा नागरिकांमध्ये सुरू आहे. मात्र, निधी मंजुरीपासून ते काम पुन्हा सुरू होण्यापर्यंत सातत्याने संबंधित विभागाच्या दारात पाठपुरावा करणाऱ्या व्यक्तींच्या भूमिकेची वस्तुनिष्ठ नोंद होणेही तितकेच महत्त्वाचे आहे. विकासकामे ही कोणत्याही एका व्यक्तीची मालमत्ता नसतात; ती नागरिकांच्या करातून आणि सरकारी यंत्रणेतून पूर्ण होणारी सार्वजनिक कामे असतात. त्यामुळे कामाचे उद्घाटन, पाहणी किंवा फोटोसेशन यापेक्षा कामासाठी प्रत्यक्ष कोणी पाठपुरावा केला, कोणत्या स्तरावर प्रश्न उपस्थित केला आणि प्रशासनाकडून काम मार्गी लावण्यासाठी कोणते प्रयत्न केले, याला अधिक महत्त्व आहे. मालटेकडी उड्डाणपुलाच्या दुरुस्तीचा प्रश्न पुन्हा मार्गी लागण्यामागे रऊफ जमीनदार यांनी केलेल्या सातत्यपूर्ण पाठपुराव्याची भूमिका असल्याचे त्यांच्या समर्थकांकडून सांगितले जात आहे. आता मंजूर निधीचा योग्य वापर करून काम दर्जेदार आणि वेळेत पूर्ण होणे, हीच नागरिकांची प्रमुख अपेक्षा आहे. रखडलेल्या कामाला पुन्हा गती मिळवून देण्यासाठी केलेला पाठपुरावा हा केवळ राजकीय श्रेयाचा विषय न राहता, नांदेडकरांच्या सुरक्षित आणि सुलभ वाहतुकीशी जोडलेला प्रश्न आहे. त्यामुळे मालटेकडी उड्डाणपुलाचे काम प्रत्यक्ष पूर्ण होईपर्यंत रऊफ जमीनदार यांचा पाठपुरावा आणि प्रशासनाची कार्यवाही याकडे नागरिकांचे लक्ष राहणार आहे.
Leave a Reply